Toʻgarak (jamoa) rahbari

1. Lavozim vazifalari.

To‘garak (jamoa va studiya) rahbari Qoraqalpog‘iston Respublikasi Madaniyat vazirligi, viloyatlar va Toshkent shahar madaniyat boshqarmalari bilan kelishgan holda Qoraqalpog‘iston Respublikasi, viloyatlar va Toshkent shahar madaniyat markazlari direktori hamda tuman (shahar) madaniyat bo‘limi mudiri – madaniyat markazi direktorlari tomonidan lavozimga tayinlanadi va lavozimidan ozod etiladi.

To‘garak (jamoa va studiya) rahbari faoliyatini O‘zbekiston Respublikasining tegishli qonun hujjatlariga, madaniyat markazi rahbarining buyruq va ko‘rsatmalariga, ushbu lavozim yo‘riqnomasiga tayangan holda olib boradi.

To‘garak (jamoa va studiya) rahbari madaniyat markazi direktori va badiiy rahbarga bevosita bo‘ysunadi. To‘garaklar uchun yillik o‘quv rejalar tuzadi va badiiy rahbar tomonidan tasdiqlanishini ta’minlaydi.

To‘garak, (jamoa va studiya) rahbari guruh a’zolari bilan yuqori metodik darajada tegishli yo‘nalishda individual va guruh mashg‘ulotlarini o‘tkazadi, ularning bilim va mahoratini oshirishga erishadi, mashg‘ulotlar o‘tkazishni rejalashtiradi, o‘quv dasturlarining bajarilishini ta’minlaydi. Iqtidorli, talantli ishtirokchilarni badiiy jamoalarga jalb etadi, ularning turli tadbirlar, bayramlar, konsert dasturlari, spektakllar, turli mavzudagi ko‘rgazmalar, ko‘rik-tanlovlar, festivallarda va ko‘rgazmalarda faol ishtirok etishlarini ta’minlaydi hamda muntazam to‘garak jurnalini yuritib boradi.

Sohaga oid ilg‘or ish tajribalarini o‘rganadi, ularni tahlil qilib, umumlashtirad i va tadbiq etadi. Madaniyat markazi direktori va filial mudiri tomonidan tasdiqlangan to‘garakning yillik ish rejasi va davomadni qayd qilish jurnali, to‘garak ish jadvali asosida ish faoilyatini olib boradi. yoshlarni madaniyat va san’atga jalb etish borasidagi islohotlarni amalga oshirishda hudularning yoshlar bilan ishlash etakchilari bilan hamkorlik qiladi.

To‘garak, (studiya va jamoa) mashg‘ulot xonasini yo‘nalishiga mos ravishda badiiy bezatish va jihozlash ishlarini tashkil qiladi. To‘garak faoliyati bo‘yicha choraklik, yarim yillik va yillik hisobotlarini tayyorlaydi.

Maqom, Askiya va Baxshichilik san’ati yo‘nalishida “ustoz-shogird” an’analarining saqlanishi va rivojlanishini ta’minlaydi.

Mahallalar, maktab, bo‘g‘cha muassasalari bilan aloqa va hamkorligini amalga oshiradi, o‘rnatilgan tartibda va qonunchilik asosida pullik xizmat ko‘rsatish bo‘yicha shartnomalar tuzadi, aholini madaniyat markaziga jalb etadi.

Mehnat va ijro intizomiga, texnika va yong‘in xavfsizligiga, sanitariya va gigiena qoidalariga, xodimlar o‘rtasida o‘zaro hurmat va odob-axloq mezonlariga, ichki tartib qoidalarga rioya qiladi.

2.Bilishi lozim.

Quyidagilar: madaniyat markazi va uning filiallarining ichki mehnat tartibi va ijro intizomi talablarini; to‘garak (studiya va jamoa)larda ish olib borish shakllari va metodlarini; psixologiya, bolalar fiziologiyasi asoslarini, shuningdek yoshlar va yoshi kattalar bilan ishlashda mutahassis sifatida professional yondashuvni; madaniyat markazi faoliyatiga qo‘yilgan sanitariya-gigiena talablarini, to‘garak, (studiya va jamoa)lar rahbari lavozimiga madaniy-ma’rifiy tadbirlar tashkil eta olishi hamda xalq ijodiyotini bilishi; san’at va madaniyatimiz tarixi va an’analaridan, badiiy havaskorlik to‘garaklari va jamoalari ish uslublaridan xabardor bo‘lishi; madaniyat muassasalari ish tajribalaridan zamonaviy axborot-kommunikatsion texnologiyalardan foydalangan holda hozirgi davr talablari asosida yangicha ishlash uslublaridan xabardor bo‘lishi lozim.

3. Malaka talablari.

Quyidagilar: madaniyat va san’at sohasi bo‘yicha oliy yoki o‘rta-maxsus ma’lumotga ega bo‘lishi; “ustoz-shogird” an’analarining saqlanishi va rivojlanishini ta’minlash maqsadida, istisno tariqasida, soha bo‘yicha oliy yoki o‘rta maxsus ma’lumotga ega bo‘lmagan davlat mukofotlariga ega, taniqli va tajribali mutaxassislarni madaniyat markazlarida maqom, askiya va baxshichilik san’ati yo‘nalishida to‘garak va mashg‘ulotlar o‘tashga jalb etish; to‘garaklarni (studiya va jamoa)larni tashkil etish bo‘yicha bilim ko‘nikmalarga ega bo‘lishi, ijodiy to‘garaklarni tashkil etish bo‘yicha taqdimot materiallari va mahorat darslari o‘tib berishi talab etiladi.