Yurist

Vazifalar: Huquqiy tusdagi hujjatlar ishlab chiqadi yoki qabul qiladi. Huquq ishi bo‘yicha korxonada uslubiy rahbarlikni amalga oshiradi, tarkibiy tuzilmalar va jamoat tashkilotlariga huquqiy yordam ko‘rsatadi, da’volar rad qilingan taqdirda asoslangan javoblar tayyorlashda ishtirok etadi. Korxonaning boshqa bo‘limlari ishtirokida o‘g‘rilik, kamomad, sifatsiz, nostandart va nuqsonli mahsulotlar ishlab chiqarish va boshqa qonun buzilishlari to‘g‘risida ularni tergov va sud organlariga oshirish uchun hujjatlar tayyorlaydi. Xo‘jalik hisobi, shartnomaviy, moliyaviy va mehnat intizomini mustahkamlash chora-tadbirlarini ishlab chiqish va amalga oshirish, tashkilot mulkini asrash, o‘g‘rilik va kamomadga qarshi kurashishni ta’minlash ishlarida ishtirok etadi. Sud ishlari bilan bog‘liq da’volarni ko‘rib chiqish natijalarini tahlil qiladi va umumlashtiradi, shuningdek, mavjud kamchiliklarni bartaraf etish va korxonaning moliyaviy-xo‘jalik faoliyatini yaxshilash haqida tegishli takliflar ishlab chiqish maqsadida shartnomalar tuzish va ularni amalga oshirish amaliyotini o‘rganadi. O‘rnatilgan tartiblarga muvofiq xodimlarni intizomiy va moddiy jazoga tortish bo‘yicha hujjatlarni rasmiylashtirish, xo‘jalik shartnomalarini tuzish, ularning huquqiy asoslanganligi to‘g‘risida xulosa tayyorlash, jamoa shartnomalari shartlarini ishlab chiqish, shuningdek, debitorlik va kreditorlik qarzlari haqidagi masalalarni ko‘rib chiqish ishida qatnashadi. Da’volarga javob berish uchun tayyorlanadigan ma’lumotlar, hisob-kitoblar, tushuntirish xatlari va boshqa hujjatlarning o‘z vaqtida taqdim etilishini nazorat qiladi. Boshqa bo‘limlar bilan birgalikda tashkilot tomonidan chiqarilgan amaldagi yoki o‘z kuchini yo‘qotgan buyruqlar va boshqa me’yoriy hujjatlarni o‘zgartirish va bekor qilish bo‘yicha takliflar tayyorlaydi va ularni rasmiylashtirishda ishtirok etadi. Texnik vositalarni qo‘llagan holdaqonunchilik va me’yoriy hujjatlar bo‘yicha ma’lumot-axborot, shuningdek, amaldagi qonunchilik va boshqa me’yoriy hujjatlarni hisobga olish ishlarini olib boradi, ularni to‘ldirish, o‘zgartirish va bekor qilish bo‘yicha qaydlar qiladi. Muassasa faoliyati davomida kelib chiqadigan huquqiy masalalar, taqriz uchun tushgan me’yoriy hujjatlar loyihalari haqida xulosalar tayyorlash, shuningdek, tashkilot faoliyatini takomillashtirish bo‘yicha takliflar ishlab chiqishda qatnashadi. Huquqiy targ‘ibot, muassasadagi mansabdor shaxslarni ularning faoliyatiga taalluqli me’yoriy hujjatlar va amaldagi qonunchilikdagi o‘zgarishlar bilan tanishtirish bo‘yicha ish olib boradi. Muassasa xodimlariga hozirgi qonunchilik, shuningdek, tashkiliy-huquqiy va boshqa yuridik masalalar bo‘yicha ma’lumot va maslahatlar beradi, mulkiy-huquqiy tusdagi hujjatlarni rasmiylashtirishga yordam qiladi.

Talablar: Qonun va qonun osti aktlarini, yuqori idoralarning muassasa huquqiy faoliyatiga taalluqli farmoyishlari, qarorlari, buyruqlari, uslubiy, me’yoriy va boshqa ko‘rsatma tusidagi hujjatlarini; fuqarolik, mehnat, moliyaviy va ma’muriy huquqni; qonunchilik va me’yoriy hujjatlar bo‘yicha ma’lumot-axborot ishlarini; tashkilotning moliyaviy-xo‘jalik faoliyati bo‘yicha hisob olib borish va hisobot tayyorlash tartibini; xo‘jalik shartnomalarini tuzish va rasmiylashtirish tartibini; iqtisod, mehnatni tashkil qilish, ishlab chiqarish va boshqaruv asoslarini; mehnatni muhofaza qilish, texnika xavfsizligi, ishlab chiqarish sanitariyasi va yong‘inga qarshi himoya qoida va me’yorlarini.