Xoreograf

1.Lavozim vazifalari. Xoreograf Qoraqalpog‘iston Respublikasi Madaniyat vazirligi, viloyatlar va Toshkent shahar madaniyat boshqarmalari bilan kelishgan holda Qoraqalpog‘iston Respublikasi, viloyatlar va Toshkent shahar madaniyat markazlari direktori hamda tuman (shahar) madaniyat bo‘limi mudiri – madaniyat markazi direktorlari tomonidan lavozimga tayinlanadi va lavozimidan ozod etiladi. Xoreograf aholining, ayniqsa yoshlarning raqs san’atiga bo‘lgan qiziqishlari, talab va ehtiyojlarini o‘rganadi, ularni to‘garaklarga jalb etadi. Xoreograf madaniyat markazi va o‘zidan yuqori turuvchi tashkilotlarga bevosita bo‘ysunadi. Madaniyat markazi va uning filiallarida havaskorlik raqsto‘garaklari faoliyatini tashkil etadi, rivojlantiradi va ularning ish rejasini (yillik, chorak, oylik) ishlab chiqadi va unga qat’iy rioya qilinishini ta’minlaydi. Mumtoz va zamonaviy raqs repertuari va xalq xoreografiyasini a’lo darajada bilishi, yangi va avval yaratilgan raqs dasturlari, alohida raqs-xoreografik dasturlari, shuningdek musiqiy dasturlar uchun mustaqil raqslarni sahnalashtirib, xoreografiya bo‘yicha yangi kompozitsiyalarni, o‘zbek xalq raqslarining harakatlari elementlarini amaliy hamda metodik tomonlama o‘rgatadi. Havaskorlik raqs jamoalarining klassik mahoratini oshirish bo‘yicha mashg‘ulotlar o‘tkazadi. Badiiy havaskorlik raqs jamoalari va to‘garaklari repertuarlarini shakllantiradi. Havaskorlik raqs jamoalari sahna liboslari namunalarini, markaz tomonidan tashkil etilgan konsert va boshqa badiiy chiqish dasturlarida raqslarni sahnalashtiradi. Dasturlarini markaz qoshidagi maxsus, badiiy kengashga ko‘rib chiqish uchun kiritadi. Tasdiqlangan reja asosida olib borilgan ishlar yuzasidan muntazam hisobotlar tayyorlaydi. Badiiy havaskorlik raqs jamoalari va to‘garaklar faoliyati borasida hisobotlar yuritadi, ichki tartib qoidalarga rioya qiladi, ushbu sohaga oid barcha ma’lumotlarni to‘plab, alohida ro‘yxatlangan yig‘ma jildlarda saqlaydi. Iqtidorli havaskor raqqos va raqqosalarning ijodini ommaviy axborot, radio va televideniya orqali targ‘ib etishga tavsiya etadi. Havaskorlik raqs jamoalari va to‘garaklar faoliyatini rivojlantirish borasida havaskorlar bilan muntazam ravishda suhbatlar, mashg‘ulotlar o‘tkazib boradi. Madaniyat markazi va uning filiallari qoshidagi raqs to‘garaklariga uslubiy, amaliy yordam ko‘rsatadi. 13 Mahallalar, maktab, bo‘g‘cha muassasalari bilan aloqa va hamkorligini amalga oshiradi, o‘rnatilgan tartibda va qonunchilik asosida pullik xizmat ko‘rsatish bo‘yicha shartnomalar tuzadi, aholini madaniyat markaziga jalb etadi. Mehnat va ijro intizomiga, texnika va yong‘in xavfsizligiga, sanitariya va gigiena qoidalariga, xodimlar o‘rtasida o‘zaro hurmat va odob-axloq mezonlariga, ichki tartib qoidalarga rioya qiladi. 2.Bilishi lozim. Quyidagilar: madaniyat markazlari faoliyatiga oid normativ-huquqiy hujjatlarni; zamonaviy axborot texnologiyalardan foydalana olishi hamda ularni joriy etish usullarini; jamoatchilik bilan ishlashni hamda madaniy va ma’rifiy tadbirlarni tashkil etish tartib qoidalarini bilishi lozim. 3. Malaka talablari. Quyidagilar: madaniyat va san’at sohasining xoreografiya yo‘nalishi bo‘yicha oliy yoki o‘rta-maxsus ma’lumotga ega bo‘lishi; badiiy havaskorlik raqs sohasining ish uslublari, raqs sahnalashtirish uslublari, milliy raqs jamoalari va to‘garaklar ish tajribasidan xabardor bo‘lishi; xoreograf o‘z sohasini mukammal egallagan, o‘z ustida muntazam ishlaydigan, tashkilotchilik qobiliyatiga ega, madaniy-ma’rifiy muassasalarga tegishli normativ-huquqiy hujjatlarni o‘rgangan bo‘lishi lozim.